رمضان المبارک میں آٹے کی قلت کا خدشہ

لاہور (مانیٹرنگ ڈیسک) محکمہ خوراک کی جانب سے فلور ملزم کو ماہ رمضان میں دئیے جانے والے گندم کے کوٹے میں کمی کردی گئی جس سے شہر میں رمضان کے مبارک مہینے میں آٹے کی قلت کا خدشہ پیدا ہوگیا ہے۔ محکمہ خوراک نے بھی عوام کو نیا جھٹکا دیدیا ہے جس کے مطابق محکمہ خوراک نے فلور ملزم کو ماہ رمضان کیلئے دی جانیوالے گندم کے کوٹے میں کمی کردی ہے۔ تفصیلات کے مطابق گزشتہ ماہ رمضان میں فلور ملوں کو دی جانیوالی گندم 34 بوری فی باڈی تھی جبکہ اس سال رمضان کیلئے فراہم کی جانیوالی گندم کا کوٹہ پہلے 21 بوری فی باڈی مقرر کیا گیا تھا تاہم اب یہ کوٹہ 25 بوری فی باڈی کردیا گیا ہے جس کے باعث شہر میں آٹے کی قلت کا خدشہ پیدا ہوگیا ہے۔ فلور ملز مالکان کا کہنا ہے کہ حکومت کی جانب سے محکمہ خوراک میں تاحال ڈائریکٹر تعینات نہیں کیا گیا جس کے باعث انہیں شدید مشکلات کا سامنا ہے جبکہ صوبائی وزیر خوراک بلال یاسین نے کہا ہے کہ کسی صورت آٹے کی قلت رمضان میں نہیں ہونے دیں گے، گزشتہ سال رمضان کی نسبت اس سال زیادہ گندم فراہم کریں گے۔