کتنی نیند بہترین؟ جدید سائنسی تحقیق

برمنگھم (نیوز ڈیسک) دن بھر کے کام کے بعد اچھی نیند جسم کی انتہائی اہم ضرورت ہوتی ہے اور یہ تو سب جانتے ہیں کہ نیند کی کمی سے صحت کے مسائل پیدا ہوجاتے ہیں لیکن سائنسدانوں نے ایک تازہ تحقیق میں انکشاف کیا ہے کہ ضرورت سے زیادہ سونا کہیں زیادہ خطرناک ہے اور بعض صورتوں میں جان لیوا بھی ثابت ہوسکتا ہے۔ یونیورستی آف واروک کے سائنسدانوں نے 9000 سے زائد ادھیڑ عمر لوگوں پر تحقیق کی اور معلوم کیا کہ آٹھ گھنٹے سے زائد سونے والے افراد میں دماغی کمزوری، بھلکڑ پن، کمزور قوت فیصلہ اور دل کی بیماریاں زیادہ پائی جاتی ہیں۔ تحقیق کار ڈاکٹر مشیل نے بتایا کہ مختلف عمر کے لوگوں کی نیند کی ضرورت مختلف ہوتی ہے۔ پروفیسر فرانچیسکو نے بتایا کہ نوعمر لوگوں کیلئے 6 سے 8 گھنٹے کی نیند انتہائی ضروری ہے اور 65 سال سے اوپر کے لوگوں کو بھی اپنی ضرورت کے مطابق نیند لینی چاہیے۔ جب آپ سوکر اٹھیں تو تازہ دم محسوس کریں تب ہی آپ کی نیند کو مناسب کہا جاسکتا ہے۔ کم یا زیادہ نیند کی صورت میں تھکاوٹ اور غنودگی کی کیفیت برقرار رہتی ہے۔ سائنسدانوں نے بتایا کہ ادھیڑ عمر لوگوں میں ضرورت سے زیادہ نیند بہت خطرناک ثابت ہوسکتی ہے اور ذیا بیطس اور دل کی بیماریوں کا باعث بھی بن سکتی ہے۔ ماہرین نے مزید بتایا کہ بے روزگار اور غریب لوگوں میں ضرورت سے زیادہ سونے کا خدشہ زیادہ پایا جاتا ہے۔