سگریٹ پینے والے نوجوانوں کے لئے واحد خوشخبری

 شکاگو (نیوز ڈیسک) سگریٹ نوشی اور غیر صحت بخش غذاﺅں کی وجہ سے دل کی بیماریاں اور متعدد دیگر مسائل پیدا ہوجاتے ہیں لیکن ایک تازہ سائنسی تحقیق نے خوشخبری دی ہے کہ اگر آپ پچاس سال کی عمر تک بھی اپنی بری عادات کو چھوڑ دیں تو نہ صرف مزید مسائل سے بچ جائیں گے بلکہ کوشش کریں تو جو نقصان ہوچکا ہے اس کے اثرات بھی ختم کئے جاسکتے ہیں۔ امریکہ کی نارتھ ویسٹرن یونیورسٹی کے سائنسدانوں کا کہنا ہے کہ بہتر تو یہ ہے کہ آپ 30 سال کی عمر تک غیر صحت بخش عادات کو چھوڑدیں لیکن 40 سے 50 سال تک کی عمر تک بھی اگر سگریٹ نوشی چھوڑدی جائے اور بہتر غذا اور ورزش کی عادت کو اپنایا جائے تو دل کی بیماریوں سے محفوظ رہا جاسکتا ہے۔ سائنسی جریدے ”سرکولیشن“ میں شائع ہوئے، اس تحقیق نے خبردار کیا ہے کہ بڑھتی عمر کے ساتھ سگریٹ نوشی، شراب نوشی، غیر صحت بخش غذا اور دیگر منفی عادات شروع کرنے والے زیادہ نقصان اٹھاتے ہیں۔ لہٰذا یہ بات واضح ہوگئی ہے کہ کم عمر کی بجائے زیادہ عمر میں صحت بخش عادات نہ اپنانے والے صحت کے زیادہ خطرات سے دوچار ہوتے ہیں۔ تحقیق کے سربراہ پروفیسر بونی سپرنگز نے اچھی صحت کیلئے کچھ مفید مشورے بھی دئیے۔ ان کا کہنا ہے کہ خوش و خرم صحت مند زندگی کیلئے وزن زیادہ نہ ہونے دیں، سگریٹ نوشی سے پرہیز کریں، ہفتے میں کم از کم پانچ دفعہ 30 منٹ کیلئے ورزش ضرور کریں، شراب نوشی سے دور رہیں اور زیادہ فائبر والی غذائیں استعمال کریں خصوصاً جن میں سوڈیم کم ہو اور پھلوں اور سبزیوں کو خوراک کا ضروری حصہ بنائیں۔